Islaami Shariyet Aur Ibadat

Quran-e-kareem us Shariyet ki yaad taaza karta hai jo Allah Taala ne insaan ke andar mukhtalif quwaton ki surat may widiyet kar rakhi hai. Us Shariyet ke zariye insaan ke andruni qawa khususan quwat-e-shawania aur quwat-e-ghazabia ki tahzeeb-o-tadeeel hoti hai. Jiske natijey may mukhtalif akhlakh paida hote hain. Maslan, halam, esaar, sabr-o-khinaa-at, sakhawat, shuja-at, ita-at, akhlaas, sadaq, dayanat, mehnath, amal-e-saaleha ki istadad waghaira…gharz jo fitrat qudrat ne baatan may rakhi thi ,Quran ne usey yaad dilaya hai .jaise fermaya,

“ Fi kitaabin maknun “ ( jo kitaab-e-mehfuz may likha hua hai).sura-e-waqiya,aayet no.79.

Yaane sahefa-e-fitrat may jo chupi hui kitab thi aur jisko her shaks na dekh sakta tha. Usko is waahi ne sab ke saamne khol kar rakh diya hai aur uski puri puri wezahat kardi. Ye hai islaami Shariyet aur Quran-e-kareem ki amali taaleem ka tassawur jiski tashreeh-o-tafseel zindgi ke tamaam pehluvon per haavi hai.

Insaan ko isliye paida kiya gaya hai take uske zariye khaalikh-e-dojahaan ke wajud ka zahur aur uski sifaat ka namud ho, israar fitrat aur raazhaa-e-qudrat khul kar saamne aajaayen yaane insaan khudanuma wajud bane aur mazhar-e-sifaat-e-Baari ban kar takhlikh-e-kaainaat ki gharz-o-ghaayet puri kare. Isliye insaan ko abad kaha gaya hai. Kyonke ibaadat ke mane kisi ka nakhsh qabul karne ke hain. Aur insaan ko aise malkuti qawa aura ala aqdaar widiyet huye hain jinki madad se had-e-bashriyet ke andar rahte huye jahaan tak uske liye mumkin hai vo sifat-e-ilaahiya ka pura naqsha pesh karsakta hai. Aur un ko apne andar paida karne ki puri puri ahliyet rakhta hai.

Allah Taala Quran-e-kareem may fermata hai,

“Wa ma khala-khutul-jinna wal-insa illa li-aabu-dun.” (sura-e-zaariyaat aayat 57.

Yaane maine jin-o-ins ko sirf ibadat ke liye paida kiya hai. Yaane isliye ke vo mere zahur ka maujab aur mere sifaat ka mazhar banen.

Is Aayet-e-Kareema ki tafseer vo hadees-e-qudsi karti hai jisme Allah Taala fermata hai ,

“ Kuntu Kanzan makhfi-yan fa-ard-tu An u-arafa falakhtu adama.”

Yaani mai ek makhfi khazana tha ,phir maine irada kiya ke mai pehchana jaaun isliye maine Adam ko paida kiya. Iski mazeed wizahat Aanhazrath sallaAllahu walahi wassalam ke irshad may hai,

“ InnAllaha khalakha Adama alaa suratihi.”

Yaane Allah Taala neAdam ko apni surat per paida kiya. In irshadaat ka matlab yehi hai ke insaan ki paidaish ka maqsad zaat-e-Baari ka zahur uttam hai kyonke vo siffat-e-ilaahiya ka mazhar ban sakta hai.aur uski qudrat ke israar per se perda uthaane ki zehni istaadaad lekar paida hua hai. Yehi wajah hai ke istanbaad, ejaadaath,aur naye naye inkishaafaath ki jo qaabiliyaten insaan ko widiyet ki gaii hain vo kisi dusri makhlukh ko atta nahi huyeen.

Haqeeqi maano mayAllahTaala kea bad kehlane ki raah ye bhi hai ke insaan AllahTaala ke huzur apne jazbaat-e-shukur ka izhaar kare aur uske ehsaano ka apni zubaan se iqraar kare ,kyonke insaan fitratan apne muhsen ka shukriya ada karne per majbur hota hai jaisa ke hadees may ata hai,

“ jubilatil-khulubu alaa hubbi man ahsana ilaye-ha “

yaane insaan ki banawat hi aisi hai ke vo apne muhsan se mohabbat karne per majbur hota hai. Allah Taala ka haqeeqi abad banne ke liye ye bhi zaruri hai ke insaan gunahon aur badiyon se najaat paajaaye aur apne dil ko paak karle. Kyonke AlahTaala paak hai aur paak log hi uski Baargah may jaasakte hain. Yehi wajaah hai ke tamaam mukhrara ibadaat may ye baat madd-e-nazar rakhi gaii hai ke unke zariye nafs-e-insaani badiyon se paak hojaaye aur usey aisi taaqat miljaaye ke vo mukhtalif qism ke hawa-o-hawas chodne ke qaabil hojaaye.ektaraf AllahTaala se uske tallukhaat durust hojaayen aur dusri taraf makhlukh-e-Ilaahi se uske maamlaat biklul durust aur saaf rahen.

Namaaz Ki Ahamiyet

-------------------------------

Namaaz her ek musalman per ferz hai. Hadees shareef may aaya hai ke AanHazrath SalahAlahi Wassalam ke paas ek qaum islaam laai aur arz kiya ke YaRasulAlah humen Namaaz muaf ferma di jaaye ,kyonke hum karobaari aadmi hain, maweshi(janwar) waghaira ke sabab se kapdon ki safaii ka koii etmaad nahi hota aur na humen fursat hoti hai.tou Aapne uske jawaab may fermaya ke “dekho jub Namaaz nahi tou hai hi kya? Vo deen hi nahi jisme Namaaz nahi. Namaaz kya hai? Yehi ke apne ajz-o-niyaaz aur kamzorion ko Allah ke samne pesh karna aur apni haajat-rawaai chahna, kabhi uski azmat aur uske ahkaam ki bajaa-aawri ke waste dasta-basta khade hona aur kabhi kamaal muzalat aur ferotani se uske aage sajde may gir jaana ,us se apni hajaath ka mangna, yehi Namaaz hai. Ek saayel ki tarha kabhi masul ki taarif karna ke tu aisa hai,tu aisa hai. Uski azmat-o-jalal ka izhaar karke uski remhat ko junbish dilaana, phir us se maangna. Pas jis deen may ye nahi vo deen hi kya hai. Insaan her waqt mohtaaj hai ke us say uski raza ki raahen maangta rahe aur uske fazal ka khwastgaar ho. khudaTaala ki mohabbat, usi ka khauf ,usi ki yaad may dil laga rahne ka naam Namaaz hai.aur yehi deen hai “.

“ KhudaTaala tak pahunchna manzil ba manzil hota hai.jisme insaani mehnath,koshish, jadojahad ki zarurat hoti hai. Is tarha manzil-e-muraad tak pahunchne ke liye yaane khurb-e-Ilaahi haasil karne ke liye Namaaz ek gaadi hai jasper sawaar hokar vo jald KhudaTaala ko paa sakta hai. Aur jisne Namaaz tark ki vo kis tarha Khuda ko paa sakta hai”.

Isi tarha ek aur jagah Huzur fermaate hain,

Namaaz se badh kar aur koi wazeefa nahi kyonke isme Hamd-e-Ilaahi hai ,istaghfaar hai. Aur Darud-e-Shareef, tamaam wazayef aur auraad ka majmua yehi Namaaz hai. Aur is se her qisam keghum, waham door hote hain. Aur mushkilaat hul hoti hain.Namaaz ko sanwaar sanwaar kar samjh samjh kar padho, aur masnun duaon ke baad apni zubaan may bhi duayen karo. Is se tumhen itminaan-e-qalb hogaaur sab mushkilaat Khuda Taala chahega tou is se hul hojaayengi.Namaaz yaad-e-Ilaahi ka zariya hai. Isi liye fermaya,

“ Akhimis-salaata lizikri.”

Pas Namaaz ruhaani taraqiyaat ka zariya hai.Namaaz ke zariye Islaam ne Dua ka raasta khola hai. Dua Namaz ka aham hissa hai kyonke Dua hi ke Zariye duniya ki kul hikmaten zaahir hoti hain. Her ek Baitul-ilm ki kunji Dua hai. Aur koi ilm-o-marifat ka daqeeqa nahi jo baghair iske zahur may aaya ho. Dua kya hai? Jub hum ghaur-o-fikar ke waqt ek makhfi amar ki talaash may nihayet ameeq darya may utar kar haath paun maarte hain tou hum us halaath may bazubaan-e-haal us Aala taaqat se Faiz talab karte hain jis se koi cheez poshida nahi..Talab-e-Faizaan ka dusra naam Dua hai. Dua karne se kya matlab hota hai yehi ke aalemul-ghaib jisko daqeeq dar daqeeq tadbeeren maalum hain koii ahasan tadbeer dil may daal deta hai. Ya bawajah khalikhiyet aur qudrat apni taraf se paida kare .. pas saabit hua ke “Dua dar haqeeqat talaash-e-tadbeer ka naam hai.”