Wednesday, August 5, 2026

Charagh-e-Hasti

 


Sura Albaqra

-----------

Assalam-o-walaikum wa rahamatullahi wa barkatahi qaarayeen,

Aksar dilon may sawalon ka zakhira hota hai, agar vo Quran ki ayeton per ghaur-o-fikir kar lein tamaam jawabath wahin per milenge usi may milenge..

bas shert ye hai ke andhi taqleed say bacha jaaye, baat ko sahi tareeqe say samjha jaaye.aur mohabbat ka haq mohabbat se ada kiya jaaye..

--------------------------------------------------------------------------------------

Anbia-o-Awliya akram khuda ki riyazaton ibadaton say khuda ka qurb haasil karne waale ba barkat loug hain jo barah-e-raast khuda say taaluq bana kar tamam gumrahan ke haq may dua-e-khair karte hain.

Un ki mohabbat ko waseela bana kar dua maangne waaley jaante hain ke duayein mohabbaton ki marhun-e-minnet hain aur khuda ko ye mehbub waseeley mehbub hain pasand hain.

Koi banda khuda ki marzi kaise jaan sakta hai ke us ney kub aur kis liye kisi per karam karna hai. 

haan "ummid hi manzil ki ibtida hai."

Wednesday, July 29, 2026

Wahi ( Divine reveletion )

 



"Wahi" ke laghwi maayne hain khufiya aur lateef ishara ke, jisey ishara karne waale aur ishaara paane waaley ke siwa koi mehsus na kar sake.

Alqa--dil may baat daal dena

ilham-makhfi taaleem aur talqeen

Allah Taala ki taaleem inhi lateef tareeqon se di jaati hai.

Malayeka per bhi Wahi hoti hai jinke mutabiq vo kaam karte hain,

Lafz "Wahi "Anbiya ke liye makhsus hai.

ilham -Awliya aur bandgan-e-khuda ke liye khaas hai .

Alqa- aam hai.

Alzalzal--malayeka per bhi Wahi hoti hai,jiske mutabiq vo kaam karte hain.

Al-anfal---shahad ki makhi ko uska pura kaam "wahi " ke zariye ( fitri taaleem ) ke zariye sikhaya jaata hai.

Machli ko tayerna, parindey ko udna aur navu zaida ( new born ) bache ko dudh peena bhi "Wahi " khudavandi hi sikhaya karti hai.

Ek insan ko ghaur-o-fikir, tahqeeq-o-tajasus ke baghair jo sahi tadbeer ya saayeb-e-raaye ya fikir-o-amal ki raah sujhaii jaati hai vo bhi "Wahi" hai.Is "Wahi" say koi bhi insan mehroom nahi hai.

Duniya may jitni bhi mufeed Ejaadein huii hain us may isi 'Wahi" ki kaar fermaaii hai.

Bulkey aam insanon may aaye din jo tajrubaath hote rahte hain, ke kabhi baithe baithe dil may ek baat aai ya koi tadbeer sujh gaii , ya khwab may kuch dekh liya aur baad may tajrube say patta chala ke vo ek sahi rahnumaai thi,a jo ghaib say unhein haasil huii thi.

Shahad ka ghiza hona tou zaahir hai albatha us ke andar shafa hona nisbatan ek makhfi baat hai , is liye us per mutanba kar diya gaya.

Shahad tou awal baaz amraaz may bajaaye khud mufeed hai, kyon ke us ke andar phalon ka aur phulon ka aur unka gulucose apni behtereen shakal may hota hai.

Phir shahad ka ye khaasa ke vo khud bhi nahi sadtha aur dusri cheezon ko bhi apne andar ek muddath tak mehfuz rakhta hai aur usey is qabil bana deta hai ke dawaayen banaaney may us se madad li jaaye.

Mazeed baraan shahad ki makhi agar kisi aisey ilaqey may kaam karti hai jahan koi khaas jadi buti kasrath say paai jaati ho tou us ilaqey ka shahad bhi , shahad hi nahi bulki us jadi buti ka behtereen johar hota hai aur us marz ke liye mufeed hota hai jis ki dawa us jadi buti may khuda ne paida ki hai.

Khudavanda qudus ki karam fermaaii la mehdud hai aur bandey ki rasaii us tak tab hi mumkin hai jub apna mushahida tez karey..aur apni roz marra ki zindagi, apne jism ki sakht, nizam aur uski karkardagi per ghaur kare...ke kub kahan aur kaise khuda ki rahnumaii ne samjhaya ke us ki zindagi ka daromadar usi ke karam per hai..khudavand qudus ki hikmat-e-amli bande ke qyaas se bahar hai...magar haan ekhtiyar jisne bakhshe hain sab usi ke ekhtiyaar may hai..

So bande tera karam tera amal hai aur rab ka karam teri baqa hai..uske baghair najaath mumkin hi nahi...ke tu Us ke baghair kuch bhi nahi hai..

ye faham-o-adrak ke raaste tamaam hain usi ke waastey

unhi waaston se mila karte hain bandon ko uske raastey

Tuesday, July 28, 2026

Rooh !

 



Aye bazm-e-khwaja khwajgaan salam ,

Aaj kaafi dino baad apni awaz suni hai, warna ek bazgasht musalsal keh rahi thi ke ye hoshmandi ki nishani nahi hai, so pesh hai haasil-e-zindagi ke chund nukaat...


Rooh 

--------

Insan ke andar jo rooh phunki gaii hai vo dar-asal siffat-e-ilaahi ka aks ya partou ( reflection ) hai.

Hayaath ,ilm, qudrat, irada, ekhtiyaar aur dusri jitni siffaat insan may paai jaati hain unke majmuyey ka naam hi rooh hai.

Ye dar-asal Allah hi ki zaat-o-siffat ka partou hai halka sa.jo is kalbudh-e-khaaki ( human body )per daala gaya hai..

Isi partou ki wajah say insan zameen per khuda ka khalifa aur malayeka sameeth tamaam maujudaath-e-arzi ka masjud qaraar paaya..

Yon tou her vo siffat jo makhlukhaath may paai jaati hai uska mussadar-o-menmba ( source and origin) Allah taala ki koi na koi siffat hai.

Jo cheez insan ko dusri makhlukhaath per fauqiyeth deti hai , vo ye hai ke jis jaamiyeth ke saath Allah ki siffaath ka partou us per daala gaya hai, us say koi dusri makhlukh sarfaraaz nahi ki gaii..

Subhanallah !

Tuesday, May 19, 2026

Jazeera-e-numa-Arab

 




Azeez-o-mohtaram qaarayeen salam masnoon,

Jazeera-e-arab ka intekhab khuda ki hikmat thi,

Ye her lihaz se ek aisa mazbut faisla tha jis se takkar lena kisi ke bas ki baat nahi thi.

Aur is baat ki tashreeh jazeera arab ki ahamiyet ke zariye hi hosakti hai..

Koi aisi jaaye waqu jahan islam ki faroghdasht hosake…


Bas hum isi ki tafseel arab ki geographifyaii haisiyet se jaanne ki koshish karenge…

Aaaj ka daur au halaath-e-haazia isi baat ki gawahi de rahe hain ke khuda ne apne is faisley say is moqadas serzameen ko alam-e-islam ka muhafiz kar diya…




Ar-raheeq-al-makhtum

—----_—-----------------

Lafz arab ke maane hain sehraa aur be aab-o-gyah zameen..


Usi sehera ko gulzar kar diya…taaki ilsam ki tabligh karne walon ke liye asaniyan faraham ho sakein..


Arab ke maghreb may baher-e-amar aur jazeer-e-numa seena hai,

Mashriq may khalij-e-arab aur junubi iraq ka ek bada hissa hai,

Junub may baher-e-arab hai , jo dar haqeeqat baher-e-hind ka phailau hai,

Shumaal may mulk shaam aur kisi qadar shumaali iraq hai.


Jazeera numa arab tibayi aur jughrafiyai haisiyet se badi ahamiyet rakhta hai,

Andruni taur per ye her chahar janib se sehra aur registan se ghira hua hai,

Jis ki badaulat ye aisa mehfuz qila ban gaya hai ke bairuni qaumon ke liye is per qabza karna aur asar-o-nafuz phailana sakhth mushkil hai.


Yehi wajah hai ke qalb jazeera-tul-arab ke baashisndey ahad-e-qadeem se jumla mamlath may mukamal taur per azad aur khud mukhtar nazar aate hain.


Halankey ye do aisi azim taqaton ke hum saaye they ke agar ye thos rukawat na hoti tou unke hamley rok lena bashindgaan-e-arab ke bas ki baat na thi.


Baironi taur per jazeere numa arab purani duniya ke tamam malum barr-e-azamon ke beechon beech waqiya hai aur khushki aur samandar donon raaston se in ke saath juda hua hai.


Iska shumaal maghribi gosha, barr-e-azam afriqa may dakhiley ka derwaza hai, shumali mashriqi gosha europe ki kunji hai, mashriqi gosha iran, wast asia aur mashriqi bayeed ke derwaze kholta hai aur hindustan aur chin tak pahunchata hai.


Is tarah her barr-e-azam samandar ke raaste bhi jazeer-e-numa arab se juda hua hai aur unke jahaz arab bandar gahon per barah-e- raast langar-andaz hotey hain.


Is jaghrafiyaii mahal-e-waqu ki wajah se jazeera-tul-arab ke shumali aur junubi goshey mukhtalif qaumon ki amajagah aur tijarat-o-saqafat aur funun-o-mazahab ke lain dain ka markaz rah chukey hain…

Monday, December 30, 2024

aye dil zara hosh kar...

 


kaafir ki ye pehchaan ke afaaq may gum hai

momin ke ye pehchaan ke gum usme hain afaaq

--------------------------------------------------------------------

Salam masnoon Dosto..

Haal hi may jo naya shagufa in insaniyet ke dushmanon ne choda hai usi ne mujhe kuch likhne ki tahreek di hai...zameen ka malik mokhtar to khaliq hai..aur uske faisle karne ka ekhtiyar bhi sirf usi ko hai..ek khilaf-e-qanun-e-qudrat inkishaaf ko manna tou door uske baare may ghaur karna bhi insaniyet ki tauhin hai..akhir ye farsuda khayal itni sadiyon se kisi ko kyon nahi aaya...ye achanak kis maha-atma ko akash-wani huii hai...ke falaan jagah uski thi ...yehan ka panahgazeen falaan tha..

sach poochiye tou khuda kub zameen ka mohtaj hai..uske liye tou saara alam kum pad jaayega...agar samana chahega tou ek chote se mohabbat bhare dil may sama jaayega...

Ghareeb nawaz ki khankha sadiyon se mohabbat-o-ithad ka amali namuna ban kar baghair kisi tafreeq ke sab ke liye rahat-o-sakun ka baayes bani hui hai..aaj in ki tafreeq  aman pasand logon may phut daalne ki nakaam si koshish  hai..

Ab bhi waqt hai aye jahal, zara sanbhal...khuda ke ghaiz-o-ghazab ko awaz na de..ye khankha nasheen us malik-e-do-jahan ki rahmat ka asra hain..waseela-e-faiz hain...jinke sadaq ka gawah hain ye joq-dar-joq aane waale  zayereen..,ye sadiq ashiqeen...in khuda ke waliyon ne apni zindagi ko duniya walon ke liye paigham bana diya..jo rehti duniya tak nashar hota rahega..

jo kaam koi zinda alambarda na kar saka kabhi , ye in perda nashin buzargaan-e-deen ne kar dikhaya hai...itihad ki anokhi misaal qayem ki...her dil may khulus-o-mohabbat ka pauda perwan chadaya..jahan bhi unhein dilon ki zarkhizi nazar aai apni mohabbat ka beej boya...yon ye silsila farogh paata raha..banjar dilon ki abiyari inhi ka karnama hai...

khud quran kehta hai ke aye mohammed keh do..yaane ke khuda ne apne mehbub ki tawasat ko azmat bakhshi.warna vo yon bhi kehta jaisa ke vo hakim hai..usne insan ko apni sifaton ka aaina banaya..yon apne jamal ko mulahiza fermaya.

 ye ghaur-o-fikir ka lamha hai Dosto..aapka dil gawah hai ke aapko kya mila hai..raah mili, rahbar mile, khuda mila...gumrahon ko iman mila...bhatke huon ko raah-e-haq ka nishan mila...khuda bande ki bemisaal mohabbat ki gawahi deta hua ye darbaar khud gawah hai ke ye zamin jahan khuda ka jalwa her taraf roshan hai ....khuda ne zamin ki khilafat unhi ko bakhshi jo uske ahal hain...jin per khud khuda ko naaz hai...

Sunday, June 23, 2024

Hazrath Ibrahim Alihisalam

 



vo akeley insan bajaaye khud ek ummat they, jub duniya may koi musalman na tha tou ek taraf vo akeley islaam ke alambardar they aur dusri taraf saari duniya kufar ki alambardar thi.

Us akeley banda-e-khuda ney vo kaam kiya jo ek ummat ke karney ka tha.

Vo ek shaks na they bulkey ek " Pura Irada " they.

Hazrath Ibrahim Alihisalam iraq may "urr" ke moqam per paida huye.apne bhatijey hazrath luuth Alihisalam ko bahira-e-luuth ke mashriq may maamur kiya..

Aag ke alau ( namrud ka waqiya) se bach nikalne ke baad aap watan chod kar pehle hurran ( haaraan) gaye..phir wahan say phalastain ki taraf muntaqal huye aur bait ale, bayet jabrun aur beer sheeba may apni dawat ke markarz qaayem kiye..wahan say aap misar tashreef lay gaye..jo us zamaane may iraq ke baad tahzeeb-o-tamadun ka gahwara tha. 

Uske baad aap nay hijaz ka rukh kiya aur makkey may baitullah taameer kar ke uski khidmat hazrat ismail Alahisalam ke suprud ki. phir phalsatain may (jairun)ko apna miskin banaya.aur yehin aapka intiqal hua..


Aap ke baad aap kay saahebzaade Ishaq Alahisalam us markaz may jaanashin huye.aur un say ye meeraas hazrath Yaqub Alahisalam tak pahunchi.

Tabdili-e-imamath ka elaan hone ke sath hi qudrati taur per tahavil-e-qibla ka elaan bhi zaruri tha.jub tak bani israil ki imamath ka daur tha baitul-muqadas markaz-e-dawat raha..aur wahi qibla-e-ahal-e-haq bhi raha..jub bani israil is munsab say ba-zabita maazul kar diye gaye tou baitul moqadas ki markaziyet bhi aap say aap khatam hogaii..

Hazrath Nuh Alahisalam ke baad hazrath Ibrahim Alihisalam pehle nabi hain jin ko Allah nay alamgir islami dawat phailaane ke liye muqarar kiya tha. Unhon nay pehle khud iraq se misar tak aur shaam-o-phalastain say registaan-e-arab ke mukhtalif goshon tak barson gasht laga kar Allah ki itta-at-o-fermanbardari ( yaani islaam ) ki dawat di.

Phir apni is mission ki eshaa-at ke liye mukhtalif ilaqon may khalifa muqarar kiye..

Sharq-e-Urun may apne bhatijey hazrath Luut Alihisalam ku aur phalastain may apne betey Ishaq Alahisalam ko aur andrun-e-arab may apne badey betey Ismail alaihsalam ko maamur kiya.phir Allah taala ke hukum say makkey may vo ghar taamir kiya jiska naam "Kaaba hai." aur Allah hi ke hukum say vo is mission ka markaz arar paaya..Aal-e-ibrahim Alahisalam ko ye fazilath atta ki gaii ke inmey anbiya-o-salateen ka silsila qayem kiya aur beshter paighambar aap hi ki nasal say huye..hatta ke kainath may sab say afzal "Hazrath Mohammed Rasulallah wa alaihi wassalam "bhi Hazrat ismail Alaihisalam ki nasal se huye..

Hazrath Ibrahim Alahisalam ki nasal say do badi shaakein nikleen..ek Hazrath Ismai Alaihisalam ki aulad jo arab may rahi.quresh aur arab ke baaz dusre qabaayel ka taluq usi shaakh se tha.

Dusrey Hazrath Ishaq Alihisalam ki aulad jin may hazrath yaqub Alihisalam,yusuf Alihisalam,musa Alihisalam Davud Alihisalam

sulaiman Alihisalam ,yehia Alahisalam,Esa Alihisalam aur bahut say anbiya Alaihisalam paida huye..

Hazrath yaqub Alihisalam ka naam chunkey israeel tha isliye ye nasal bani israeel ke naam se mashoor hui..isi shaakh se pehle "yehudiyet" paida huii aur phir "esaaiyet" nay janam liya..

khiyanath

 



Jo shaks dusrey ke sath khiyanath karta hai ,sab say pehley apne nafs ke sath khayanath karta hai, 

kyon ke dil aur dimagh ki jo quwatein uskey paas bataur-e-amanath hain un per bejaa tasaruf kar ke unhein majbur karta hai ke khiyanath may vo uska sath dein aur apne zameer ko jisey Allah ne uska muhafiz banaya tha, is hadh tak daba deta hai ke vo is khayanath-kari may sadh-e-raah banney ke qaabil nahi rehta. 

Jub insan apne andar is zaalimana dastbard ko paay-e-takmil tak pahuncha leta hai tab kahin bahar is say khayanath-o-maasiyet ke afaal saadar hote hain..

 

Hamaarey tahat-us-shavoor may poshida haqeeqi quwatein khuda ki taraf say widiyeth ki gaii hain.jinka zahoor hazar mukhalifaton ke bawajud ho kar rehta hai, ke khuda bandey ke tawasath say hi is duniya may apna izhar chahta hai jisey rokna kisi ke bas ki baat nahi..

Anbiya akraam aur kitaabein aur daayaan-e-haq insan ke andar koi naii cheez paida nahi kartey, bulkey usi cheez ko ubhaarte hain jo unkey andar pehle say maujud thi..