Maslak-e-Saalihain

Aaj ka ye daur  jadeed pareshanian lekar haazir hua hai…jiddat insaan ke bartau may hai..insaan ka khameer ek hi khaasiyet rakhta hai…usey  apni haqeeqat say rushanaas karaane waali nazar darkaar hai…jub bhi mai ne in fikr-o-halaath ka mushahida kiya aur is besakuni ki wajah tatoli bas ek hi jawaab haath aaya…raahen rahbar ke baghair ujaala nahi paa sakteen..bhatke huye ko manzil ka patta wahi nazar desakti hai jisne haqeeqat paali ho…aur ye haq parast  wahi saalihain hain jinka tazkara khuda vand qudus ne Sura-e-fatiha may kiya…unki misaal ko bande ki dua ka darja diya…phir "bande ko aur konsa gawah chahiye jub ke khud khuda unka gawah hai"…Lihaza “ Hazrath khwaja Moinuddin Chishti Ajmeri Rahamatulaahi Alaiha ke baatini ishaare per likhi gaii kitaab “ Mirat-ul-Israar” nay aise hi taalibaan-e-haq ki tarbiyet ka beda uthaaya aur aaj tak ye silsila jaari hai…so aap sab ki nazar wahi khidmat pesh hai jo khidmatguzaron ko Sultaan bana deti hai…

Tamaam sadion ke Awlia Akram ka maslak-o-mashrab bayeena wahi tha jo Anhazrath salla Allahu wa alahi wassalam, Sahaba Akram. Aima Ahal-e-Bayet , Tabayeen-o-taba tabayeen ka tha, yaani ibadaath, riyazaath-o-mujahidaath aur tawajah Sheikh ney taalibaan-e-haq ka tazkiya nafs kar ke unki ruhaani taaqat may izaafa karna aur quwat-e-perwaaz ke zariye qurb visaal-e-Haq haasil karna. Bad qismati say yehi vo cheez hai jisey  ulumaa-e-zwaher ne kho kar islaam ke sirf zaahiri dhaanche per iktefa kar liya hai aur jis say islaam ko vo zoaf-o-zawaal laahaq hua ke jiska hum aaj mushahida kar rahe hain…

Ismey shak nahi ke uluma-e-zwaher ne badi kaawish aur shadh-o-madh say islaam ki zaahiri taalimaat ko tarveej di hai aur Aswa-e-Husna per kaafi had tak amal paira hone ke liye jad-o-jahad ki hai, laikin unhon ne bad qismati say Aswa-e-Husna  ke zaaheri pehlu ko mad-e-nazar rakha hai laikin baatini pehlu ko bilkul nazar andaz kar diya hai, vo ye bhul gaye ke itba-e-nabawi ki bhi do qismen hain, ek itba-e-manawi ya itba-e-baatini, dusra itba-e-suri ya itba-e-zaaheri. Itba zaaheri  may Anhazrath Salla Allahu wa Alahi Wassalam ki tarha zindagi basar karna , ibadat karna , jahad-e-nafs karna , gharz ye key tamaam afaal-o-aqwaal may aapki pairwi shaamil hai. Laikin itba-e-manawi ya baatini ka matlab ye hai ke Anhazrath Salla Allahu wa Alahi wassalam ko Haq Taala ke saath jo ishq-o-mohabbat , zauq-o-shauq, qurb-o-marifat, huzuri aur visaal haasil tha usey hasb-e-istaadaad haasil karne ki koshish karni chahiye kyon ke yehi gharz-o-ghaayet-e-islaam hai aur Quran-o-Hadees ki taalimaat ka mudua-o-maqsad hai aur Awliya-o-Akraam khaasaan-e-Baargah ki vo jamaath hai jinhon ne nihaayet shadh-o-madh say itba-e-zaaheri aur itba-e-baatini dono per amal kar ke apni qalbi aur zeheni  istedaad ke mutabiq qurb-o-visaal-e-Haq ki mokhtalif manaazil-o-moqamaath tak rasaai haasil ki, daulat-e-kashaf-o-karamaat say nawaaze gaye aur zaat-o-sifaat Baari may fana-o-baqa haasil kar ke khilafat-e-ilaahiya ka taaj unke saron per rakha gaya aur islaami duniya ke mokhtalif ilaaqon may hidaayet-e-qalq ke liye maamoor mun Allah huye…

Aaj tak ye silsila-e-qidmat-e-Haq jaari hai..khuda ke bandon tak khuda ka paighaam pahunchana kaar-e-azeem hai..Aur ye azmat un azeem-ul-martaba Awliya Akraam ke perukaaron ke hisse may aai hai jinke zimme duniya ko azsar-e-nau noor-e-imaan say munawar karne ka kaam sonpa gaya..imaan tou insaan ki ghutti may pada hua hai…usko roshan karne waali mashaal  un babarkat Awliya Akraam ki khankaahon ke dum say taqayamat roshan rahegi…

Kalma-e-Tayeba

Yun to Sayed bhi ho mirza bhi ho afghan bhi ho

Tum sabhi kuch ho batao to “sahi” Musalman bhi ho

(Allama Iqbal)

Aaj duniya ka her Kalma go khud ko musalman hone ka dam bhar raha
hai.Hatta ke is zaam-e -baatila ke sabut ki khatir khugeri par aamada ho chuka hai.
Is libas-e-musalmani ke hubba w qubba me aise la taadad eimaan khor shiyateen w
munafiqeen w mushreqeen poshida hain.Jinhe khuli aankh se dekh kar bhi
Momin w munafiq ka pata nahi chalta. Maslan kisi bartan me rakhe hue paani ko
dekh kar koi bata nahi sakta hai ke ye paani meetha hai ya khara? Hargiz nahi bata
sakta jab tak is pani ko chakh na le. Theek usi tarha se lafz-e-musalman me afraq w
imtiyaz maujood hai. Is me momin w munafiq posheeda w makhfi hain.

Hazrat Khwaja Banda Nawaz Gesu daraz R.A farmate hain.

Mun se kahen shakar to zuban ko nahi maza
Jis ne chakha zuban par lizzat wahi liya

Paani ki pahchan chakhne se hogi aur momin ki pahchan taheqeeq e kalma se
hogi.Halan ke Quran majeed ne furqaan-e-hameed ki roshni mey un munafiqeen ke is
khayal-e -baatila ki nafi ki balke unhen qalbi taur par mareez hone ki sanad bhi di.

(Surah BaqraAayat ‐ 8,9)
Tarjuma: Aur kuch log kahte hain ke hum Allah aur pichle din par eimaan laaye
aur wo eimaan wale nahi fareb dena chahte hain Allah aur eimaan waalo ko aur
haqeeqat may fareb nahi dete magar apni jaano ko ,unhe is ka shaoor nahi.In ke dilo
me beemari hai.

Ab sawal ye hai ke hum momin w muslim w munafiq kis ko kahen to
Fiqa-e -islam ne is masle ko do khususiyat me darj farmaya.

Awwal iqrar-e -bissani.Duwwam tasdeeqe bilqalb.Jaisa ke Imam Aazam
Abu Hanifa R.A ka qaul hai." Eimaan dil ki tasdeeq aur zuban ke iqrar ka naam hai
aur aaza ke aamal nafs-e- eimaan se khaarij hai, haan wo eimaan me kamaal badhate
hain aur husn paida karte hain.Jo bhi kalma tayyeb ke in do mutaalbaat ko acchi
tarha pura karta hai hum in ko bila shubaa azru-e- islam momin w muslim kah sakte
hain. Halanke momin mey bhi zameen w aasman ka farq maujood hai.Jaisa ke Surah
ahzaab aayat 35 mey musalman mard aur musalman aurat,momin mard aur
momin aurat ka alag alag zikr kar ke dono me farq wazah kiya gaya ke eimaan ka
darja islam se badh kar hai. jaisa ke quran w hadees ke deegar dalail bhi is par
dalalat karte hain bahar haal meri tahreek ka maqsad “Dawat‐e‐Fikr” hai.

Mai un logo ko dawat-e -firk de kar bedaar karna chahta hun jo mahaz zubaani jama kharch ko eimaan samajh kar jannat w huron ke khwab mey mubtila
hain. Main un logo ko Daawat‐e‐fikr deta hun’ jo apni laa shaoori ke baas qalbi
amraaz me giraftar hain. Mai un logo ko dawat‐e‐fikr deta hun’ jo jahgadalu
maulwiyo ke dam-e- fareb,mey nazar band ho kar in ke naqsh-e- paa ko zary-e -nijaat samajh kar kolo ke bail ke manind chal rahe hain. Khair aamad barsar-e-matlab’

kalma tayyeb padh kar samajhne aur samajh kar padhne ke liye pesh kiya gaya ,jis
ne bhi ek martaba kalma tayyeb samajh kar padha us ke liye kalma tayyeb aane
waahid me “Kaleed-e -Maarefat” ban kar darwazae nijaat khol deta hai.Jaise
Hadees-e- paak me Hazrat Abu Bakar SIddique R.A se murawwi hai ke mai ne
Rasool Allah S.Ase pucha ke .

Tarjuma : ‐Is deen may nijaat ka khas nukta kya hai ?
To Aap (S.W.A.) ne Farmaya jisne Mera laya hua Kalma mer iDawat per Qabul kar
liya – jo maine apne chacha per pesh kiya tha yahi kalma asal nukta‐e‐nijat hai.
(Hadees‐e‐Paak :‐  Masnad imam ahmed)

Zubaa se kah bhi diya Laa Ilaaha to kya haasil
Dil‐o‐nigah musalmaan nahi to kuch bhi nahi
(Allama Iqbal)

Hadees‐e‐paak:

Tarjuma:(Jis ne kalma tayyeb ko baghair tahqeeq hazaar bar kaha wo kaafir hai)
Bila Tahqeeq tasdeeq bilqalb mumkin nahi aur biltasdeeq zubani iqrar siwaye
darogh goi ke kuch bhi nahi.Hazrat Peer Aadil Bijapuri R.Afarmate hain.
“Tahqeeq kar tasdeeq kar kalma go ban jaye ga.”

Maslan agar kisi jaga koi hadsa dar pesh ho jaye to police wale aakar
pahlemaamle ki tehqeeq karte hain phir hadse ki tasdeeq karte hain phir thane
mey ja kar is hadse ki gawahi dete hain.

"Tahqeeq-e- kalma mey bareek nukta nafi w asbaat hai.Jisme do kufr char
shirk char tauheed ke darje posheeda hain."

Huzoor Akram S.A.W Hazrat Umer nfarooque R.D.A se farmate hain momin wo
nahi jo masjid me jama hote hain aur zubani taur par Laa Ilaaha Illallah kahte
hain. Aye Umer R.D.A aise kalma go haqeeqat se be bahra aur be khabar hain. Ye
momin nahi hain balke munafiq hain kyun ke zuban se to Kalma Laa Ilaaha Illallah ka
iqrar karte hain lekin kalme ka asal maana se naa waqif hain.Unhe khaak bhi nahi
pata hai ke kalme se asal maqsood kya hai. Yaani Laa Ilaaha Illallah to kah lete
hain lekin in ko kya khabar ke nest se kya murad hai aur hest se kya? Aisa shakki
taur par kalma kahna shirk hai aur shirk ain kufr hai aise kalma go kaafir kahlate
hain kyuke unhe ye nahi maalum ke kalme mey kis ki nafi murad hai aur kis ka
asbaat.

(Az‐ganjul asrar KhwajaGharibNawaz R.A)

Isliye kalma tayyeba rushdo hidayat ke waste peer-e- kaamil ki ashad
zarurat hai. Taake wo apne ilm‐o‐amal se taalib ke Shak‐o‐shubhat ki nafi karke
baatni quwwat se kalma ke uruj‐o‐nuzul taye kara ke is ko mujassam kalma bana
de.Khayal rahe tauheed ke bilmuqabil shirk dastak de raha hai har gunah qaabile
ufu hai siwaaye shirk ke –

(SurahNisa ‐ Aayat  ‐ 116)
Tarjuma: Yaqeenan Allah nahi bakhshe ga shirk ko aur bakhsh de ga is ke ilaawa
gunaah jiske chahe ga.

Anjaam-e -safar socha hi nahi manzil pe chiraghan kya hoga
Taheqeeq nahi tasdeeq nahi phir kaamil-e-eimaan kya hoga

(Hazrat PeerAadil)

Sultanul aarefeen hazrat Sultan Baahu R.A farmate hain. Aye taalib mai
tujh ko kalma tayyeb ki taarif batlata hum,janna chahiye ke kalma tayyeb ki
tah wisal hai aur intihaa kalma tayyeb ki mushahida ilaahi hai. Pas is se maalum
hua ke rasm ke mutaabiq kalma padhne wale go kalme ko nahi jante.Go wo
zuban se kalma padhte hain. Magar wo kalma in halaq ke andar se neeche nahi
utarta hai. Balke kalma zubani aur hai aur tasdeeq aur hai. Pas jis kisi ko kalme ki
maarefat haasil ho gai wo sahi bemaarefate illahi hai aur us ki ruh zinda aur us ka
nafs faani hai. Pas jo Isshaq hain. Wahi is kalme ki taarif ko jaan sakte hain. Aur is
ke sath waasile haq hote hain.

Hum zamane ko haqeeqat ki ziya dete hain
Qalb-e-kafir ko musalman bana dete hain

(Hazrat Peer Aadil R.A)

Peer-e- kaamil ahl-e-dil hota hai aur dil wala hi dil ki haqeeqat se aagahi
bakhsh sakta hai.Jis se tasdeeq bilqalb ki daulat naseeb hoti hai. Wazah ho qalb
ke maana ulatne aur badalne ke hain dil ko bhi qalb isliye kahte hain ke wo
baayen pahlu mey ulta latka hua hai.Jo markaz‐e‐hayat hai. Khun ko tamaam jism
me pohchana is ke zimme hota hai jism mey sab se pahle jo shaye harkat karti hai
wo dil hai aur aakhir me jo uzu ghair mutahrik hota hai wo dil hai.

Huzur Akram S.A.W farmate hain har cheez ke do pahlu hote hain. Ek
zaahiri dusra baatini. Aur quran kareem ke bhi maana ke do pahlu hain. Ek zaahiri
maana dusra baatini maana. Is lehaaz se qalb ke bhi do pahlu hain ek Qalb-e-
zaahiri jo gosht ka lothda hai jise qalb-e-majaazi se taabeer kiya gaya.Dusra qalb-e-
baatini jo Lateefay-e- Rabbani Johar-e- Laasani hai jise Qalb-e-Haqeeqi ke naam se
mausuf kiya gaya hai.Jo insaan ke sath mehfooz hai.Jis ki waja se insaan tamaam
makhluq mey afzal hua.Jis tarha gosht ke lothde yaani majazi qalb ke sath jaan
qaayam hai usi tarha Lateefay-e- rabbani yaani Qalb-e- haqeeqi ke sath eimaan
qayam hai.

Lihaza qalb-e- haqeeqi ke aitbaar se bhi teen tarha ke qalb hote hain.
Awwal Qalb-e-Momin: Momin ka qalb jo sifaatullah isme momin ka mazhar
hota hai.

Huzur Akram S.A.W ka irshade paak hai. Allah taa lamomin ke qalb ki
taraf har roz teen sau sath martaba nazr-e- lutf-o- karam farmata hai.Har nazar mey
ibteda aur estaada farmata hai .Nigah-e lutfo karam se murad zikr-e- qalbi La Ilahaa
Illallahu Mohammedur rasul lullahe ki taufeeq ataa karna hai.Jis ke sabab
banda-e-momin ka qalb zinda w javed rahta hai.

Baghair zikr-e-khuda dil na hi zinda rahta
Dil-e-murdar ko har ja pe pareshan dekha

(Hazrat PeerAadil R.A)

Huzur Akram S.A.W farmate hain, Momin ka qalb rahman ki do ungliyo ke
darmiyan hai.Do ungliyo ke mane jalaal w Jamaal hain kalma-e- tayyeba ke do juz
hain.Pahla juz tauheed La Ilaaha Illallahu jo jalaal hai dusra juz Risalat
Mohammedur rasul lullahe jo Jamaal hai qalb-e-momin jalaal w Jamaal ke
darmiyan rahne ke baas isme waswase shaitaani ka ghulba kam hatta ke naa ke
barabar aur ilhaam-e -rahmaani yaani paakizah khayalaat ki kasrat zyada hoti hai.

Dusra qalb-e-muslim: Muslim ka qalb tasdeeq-e-eimaan ki niyamat se mehroom
hota hai.

(SurahHujrat –Aayat ‐14)
Tarjuma: Aap kah dijiye ke dar-haqeeqat tum imaan nahi laye lekin tum yun
kaho ke hum islam laye halanke abhi tak tumhare dilon me eimaan dakhil hi nahi
hua.

Chunke baghair tasdeeq muslim ka qalb ghaflat ka mahal ban jata hai is
mey aahista aahista munafiqat ka andhera badhne lagta hai jis ke baas in ke qalb
mey do waswase shaitaani ka ghulba zyada w paakizah khayalat kam ho jate hain.
 dil me yacche khayalat ka aana hi band ho jata hai aur kabhi yaha tak taraqqi ho jati hai ke bure kaamo ko accha aur acche kaamo ko bura samajhne lagta hai aur badkaaro ko azeez rakhne aur nekon kaaro se nafrat karne lagta hai. Isi ko dil ki maut kaha jata hai. Bahr-e -kaif’ ye zaroor hai ke muslim ko eimaan ki puri daulat se musharraf hona aasan hai kyun ke is ne eimaan ki pahli dusri shart tasdeeq bilqalb jo eimaan ki jad w asal hai paana aasan hai behter hai ke is niyamat ko kisi rahbar-e-kaamil se paaye .

Hech mard khud ba khud shekhe nushad
Hech aahan khud ba khud teghe nashad

By (Maulana Roomi R.A)

Tarjuma:Na koi loha khud ba khud talwar ban sakta hai na koi aadmi khud ba
khud darja-e- kamala ko pahoch sakta hai. (Maulana Rumi)

Teesra qalb-e-kaafir: Qalb-e-kaafir bhi do tarha ke hote hain. Ek wo jo nek aamal
karta hai magar eimaan w islaam ki daulat se mahrum hai.Quran majeed inhe
kaafiron ko daawate eimaan deta hai.Dusra kaafir wo Qalb- e- kaafir hai jo eimaan
w islaam ki niyamat se mehrum bhi hai aur bad aamaliyo me bhi puri tarha ghira hua
hai.Us ka marz chahuthe darje tak pahonch chukka hai jis ka ilaaj namumkin hai. Is
ka qalb puri tarha se murdar ho chukka hai. In ke dilo par Allah ki mohar lag chuki
hai.

(Surah Baqra –Aayat ‐ 6, 7)Tarjuma: Beshak wo jin ki kismat mey kufr hai inhe barabar hai chahe tum unhe darao ya na darao wo eimaan lane ke nahi Allah ne in ke dilo par mohar kardi.


Haasil-e-kalam: Dil ka fazl hai jo ke har insaan ko hidayat par rahne aur rab ko
pahchanne ke liye ataa kiya gaya jo zauq-o- shauk aur Kashf ka sar chashma hai aur
eimaan ke rahne ki jaga aur is ka bartan hai jab is par hi kufr ki mohar lag gai aur
kufr se wo is qadr bhar gaya ke isme eimaan ki jaga hi na rahi to ab in ke eimaan
ki kya ummid. Yaad Rakho’jin ke dilo par mohr-e -nabuwwat LAI laaha Illallhu
Mohammedur rasul lullahe sabt nahi hai unhi ke dilo par Khatmullahe ala
qulu bahum rakam kar di jaati hai.

Jin ke qalb pe mohre nabuwwat sabt hai MAROOF
Ye wo sikke hain jo har daur me darkar hote hain

Lihaza qaabil-e -aitbaar qalb.Qalb-e-momin hi hai jise arshu‐llah’ Baitu‐llah
ke khitab se nawaza gaya hai.Qalb-e -saleem,Qalb-e -Shaheed,Qalb-e- Muneeb,
Qalb-e -momin ki hi-sifaat ka naam-hai

Tarjuma: Meri gunjaish na to meri zameen rakhti hai aur na mera aasman.Haan
meri gunjaish mere banda -e-momin ka qalb rakhta hai.(Is hadees ko imam ghazali
ne ahyaa ul ulum me zikr kiya hai. Aur mohaddis welmi ne ise musnadul firdous
me ba riwayat Anas Bin Maalik R.D.A zikr kiya hai.Haafiz sayoti ne AlDarar ul
Muntashra me is hadees ki tarjeeh ki hai. MaktubaatImaam RabbaniJild
Suwwam maktubaat 287me is ko naql kiya hai.)

Zahe qismat ke apni dhadkano ki zubaa samjhe!
Haqeeqat me wo momin hai jo kalme ka bayaa samjhe!

(Hazrat PeerAadil R.A)

Qalb momin ke ausaaf w halaat isliye pesh kiye gaye taake apna apna
muaayena w mohaasiba ka rsako. 

‘Yaad rakho’ Beej phal deta hai jo acchi zameen mey sahi halat aur sahi
waqt par bo diya jaye phir ise munsib hawa aur paani milta rahe aur phir zameeni
w aasmani aafaaq se mehfooz rahe barsaat mey chhat aur deewaro me baaz daane
ug jaate hain. Magar wo phal nahi de sakte kyu ke in ki zameen durust nahi. Isi
tarha kalma tayyeba jab hi phal dega jab dil ki zameen me boya jaye. Mohabbat-e-
ilaahi ka paani paye rahmat-e- ilaahi ki hawayen lagi mukhalifat-e -anbiya w auliya ki
aafaat se mehfooz rahe. Bani Israil ki tukhmei maan sirf zubaan par ugaa jis ka
ulta nateeja nikla jisse wo aur zyada mardud ho gaye. Agar kalma tayyeba ki sahi
kaasht ho jaye to aisa phal deta hai. Ke ‘Subhan Allah’ ek aan me mardud ko
maqbul bana deta hai. Khataaon ko mita deta hai.Rab ki ataayen dilaata hai.
Irshad-e- khuda wanda hai.

Tarjuma: Kya tumne na dekha Allah ne kaisi misaal bayan farmayi kalma tayyeba
ki jaise paakizah darakht jis ki jad qaayam yaani tahtussara me aurs haakhen
aasmanome har waqt apna phal deta hai apne rab ke hukum se.

(Surah Ibrahim ‐ Aayat ‐ 24 25)
Kalma Tayyeba ki jad momin ke dil me hai aur shaakhen aasmano me.

Zindagi w maut,Qabr o hashr, harjaga phal deta hai. Is darakht ke saye me aalam

aaram karta hai.Makhluk is bartar darakht se phal khaati hai yaani faiz paati hai.

Ilm-e-Ghaib

Imam Ragib Asahani Rehmatullah ( Sun’e Vafat 502 Hijri) Gaib Ki Tareef Karte Hue Farmate Hai, Lafz’e Ghaib Masdar Hai. Jab Suraj Ankho Se Chup Jaye To Kaha Jata Hai Ke Suraj Gayab Ho Gaya, Aur Gaib Ka Lafz Har Us Poshida Cheez Ke Liye Istemaal Hota Hai Jo Insaani Hiss (Sense) Se Chuppi Ho. Aur Jo Hawas ( Yani Dekhne, Sunne, Sungne, Chakne, Chune ) Se Maloom Na Ho Sakke Aur Naa Hi Akal Ke Goor O Fikr Se Maloom Ho Sakke. Ghaib To Ambiya Aliehi Salam Ke Batane Se Hi Maloom Ho Sakta Hai.
[ Al Mukhradad Alfaaz'ul Quran, Page No. 616]


Lihaaza Pata Chala Jo Poshida Cheez Alaat Ke Zariye Se Maloom Ki Jaye Voh Gaib Nahi. (Maslan , Ultra Sound, Telephone Aur Radio Se Door Ki Awaaz Ka Sunna, Ya Internet Per Milo Door Bethe Shakhs Ko Webcam Ki Madad Se Dekh Lena) Yeh Sab Ghaib Ki Tareef Mein Dakhal Nahi Hota. Lihaaza In Kaamo Ke Liye Lafz E Gaib Janne Ka Word Bhi Use Krna Durust Nahi Hai.


Questions & Answers With Proofs:
Q1) Kya Quran E Pak Mein Allah’tala Ne Ambiya Ke Liye Ilm E Gaib Ka Zikr Farmaya Hai. Ans: Jee Haan, Allah Tala Ne Kahi Makamat Per Nabi’o Ke Liye Gaib Ka Laafz Istemaal Kiya Hai.


Proofs from Quran:
“Ghaib Ka Jaanne Wala To Apne Ghaib Kisi Per Zaahir Nahi Karta Siwaaye Aapne Pasanddida Rasool’o Ke”
[ Surah E Jin Ayaat No. 26 ]


“Aur Allah Ki Shaan Yeh Nahi Ke Aam Logo Tumhe Gaib Ka Ilm De Den, Haan, Allah Chun Leta Hai Aapne Rasool’o Mein Se Jisse Chahe”
[ Surah E Ale Imran Ayaat No. 198 ]


Hazrat Yakoob (Alaihi Salaam) Ne Aapne Beto Ke Samne Is Tarha Rab Ka Shukr Ada Kia Farmaya: “Mein Na Kehta Tha Ke Mujhe Allah Ki Woh Shaane Maloom Hai Jo Tum Nahi Jante”
[ Surah E Yusuf Ayaat No. 96 ]


Hazrat e Essa (Alaihi Salaam) Ne Aapne Ilm’i Mojaze Ka Izhaar Karte Hue Bani Isreel Se Farmaya: “Aur Tumhe Batata Ho Jo Tum Khate Ho Aur Jo Tum Aapne Gharo Mein Jama Rakhte Ho, Beshak In Baato Mein Tumhare Liye Badi Nishaani Hai Agar Tum Emaan Rakhte Ho”
[ Surah E Ahle Imran : Ayaat No. 49 ]


Hazrat Yusuf (Alaihi Salaam) Aapne Ilm’i Mojuze Ka Izhaar Yuh Karte Hai.
Hazrat Yusuf (Alaihi Salaam) Ne Jail Mein Kediyo Se Kaha, “Jo Khana Tumhe Mila Karta Hai Woh Tumhare Pass Na Aayega, Magar Mein Is Ki Tabeer Iske Aane Se Pehle Tumhe Bata Donga. Yeh Un Ilm’o Mein Se Hai Jo Mujhe Mere Rab Ne Seeekhaya Hai”
[ Surah E Yousuf Ayaat No 38 ]


Allah Tala Ne Nabi E Karim Ki Shaan Mein Irshad Farmaya, “Aur Tumhe Seekha Diya Jo Kuch Tum Na Jaante The, Aur Allah Ka Tum Per Bada Fazal Hai”
[ Surah E Nissa Ayaat No. 113 ]


In Ayaat Se Maloom Hota Hai Ke Allah Ne Aapne Rasool’o Ko Ilm E Gaib Ata Farmaya Hai. Is Ka Inkaar Quran Se Inkaar Krna Hai.


Q2) In Ayaat Mein Is Baat Ka Zikr To Nahi Hai Ke Allah Tala Ne Nabi’o Ko Ilm E Gaib Ata Kiya Hai ? Phir Aap Nabio Ke Liye Ilm E Gaib Q Sabit Krte Hai ?
Ans: Ajeeb Baat Hai Ke Quran e Pak Ki In Ayaat Ko Parh Kr Bhi Itna Na Jaan Sakke Ke In Ayaat Mein Allah Ne Nabi’o Ke Gaib K Ilm Ka Zikr Farmaya Hai.


Explaination: Pehli Ayat Mein Bilkul Waaze Farmaya Ke Gaib Ka Jaane Vala Aapna Gaib Kisi Per Zaahir Nai Karta Sirf Rasoolo Per Zahir Krta Hai Isse Tarha Dusri Ayaat Mein Bhi Yehi Farmaya Ke Allah Ki Yeh Shaan Nahi Ke Aam Logo Ko Ilm E Gaib De De, Magar Aapne Rasoolo Ko Chun Leta Hai Aur Ilm E Gaib Deta Hai.


Ahle Sunnat Val Jammat Ka Quran O Sunnat Ki Roshni Mein Nabi E Karim ( Sallallahu Alaihi Wasallam ) Ke Liye Ilm E Ghaib Ka Aqeeda Yeh Hai Ke Nizool E Quran Ke Baad Allah Tabarak Wa Tala Ne “Maa Kana Wama Yakoon’o” Yaani Jo Jo Ho Chuka Tha Aur Jo Jo Hone Vala Hai Qainaat Ki Ebdida Se Qayamat Tak, Mashrig O Magrib, Arsh O Farsh Tamam Waqiyat Ka Ilm Aap Ko Ata Farmaya. Aur Qayamat Aur Uske Baad Ke Mamlat Mein Se Bhi Aap Ko Bahot Zaida Ilm Diya Gaya Hai.


Ala Hazrat In Fatawa e Rizviya : Beshak Nabi e karim ( Sallallahu Alaihi Wasallam ) Ko ALLAH Tala Ne Tamam Awwal’een Wa Akharin ka Ilm Ata Farmaya, Maghrib o Mashrik, Arsh o Farsh, Sab Unhe Dikhaya. Zameen Aur Asamaan Ke Mulk’o Ka Shahid Banaya. Roze Awal Se Roze Akhir Tak Sab “Maa Kana Wamaa Yukunu” Unhe Bataya, In Tamam Cheezo Mein Se Koi Zar’rah Nabi E Karim ( Sallallahu Alaihi Wasallam ) Ke Ilm Se Bahir Na Raha. Ilm E Azim Habib E Karim ( Sallallahu Alaihi Wasallam ) In Sab Ko Muhi’t Hua. Na Sirf Ijma’lan Balke Har Choti Badi Cheez, Har Khushko Taar, Jo Paat’ta Girta Hai Zameen Ki Andheri’o Mein, Jo Daana Kahi Padha Hai, Sab Ko Juda Juda Tafseellen Jann Liya, Aur Allah Hi Ke Liye Tamam Tareef’e Hai.
[Fatava E Raziviya : Risala Imba Ul Mustafa Bilhali Sirriin Akhfa : Jild 29 : Page 486]


Proofs from Ahadees:
Issi Tarha Beshumar Aahadees Se Humara Yeh Aqeeda Sabit Hota Hai Lihaaza Ab Hum Aapko Hadees Ki Moeabar’tareen Kitaab Bukhari Sharif Se Ilm E Gaib E Nabi Se Mutaliq Kuch Hadees’e Bayan Karte Hai. 1) Ilm’e Gaib Tafseeli Daleel: Hazrat E Abu Moosa Ash’hari ( radi allahu anhu ) Se Farmaya Nabi E Karim ( Sallallahu Alaihi Wasallam ) Se Aise Sawalat Kiye Gaye Jo Apko Na-Pasand The, Jab Sawalat Zaida Hone Lage To Aap Naraz Ho Gaye, Phir Logo Se Farmaya Jo Chaho Mujhse Pochlo, Phir Ek Shakhs Ne Arz Ki Ke Mera Baap Kaun Hai? Aap Ne Farmaya Tumhara Baap Huzaafa Hai. Phir Ek Dusra Admi Ne Arz Ki “Mera Bap Kaun Hai”? Aap Ne Farmaya Tumhara Baap Saalim Sebha Ka Azaad Karta Ghulam Hai. Jab Hazrat’e Umer ( radi allahu anhu ) Ne Aap Ke Cheher’e Per Gazab Ke Asaar Dekhe, To Arz Kiya Ke Hum Allah Ki Taraf Tauba Karte Hai.
[ Sahih Bukhari , Kitaabool Ilm , Safa Number. 21, Hadees No. 96 ]


2)Nabi E Karim ( Sallallahu Alaihi Wasallam ) Ne Makhlook Ki Ib’tida Se Le Kar Logo Ke Jannat Aur Dozakh Mein Jaane Tak Ki Khabre Di. Tariq Bin Shahab Rehmat Ullah Se Marwi Hai, Unhone Ne Kaha Mene Hazrat E Umer Ko Sunna Woh Farmate Hai Ke Nabi E Karim ( Sallallahu Alaihi Wasallam ) Humare Darmiyan Ek Baar Khade Hue Aur Makhlook Ki Paidaish Ki Ibteda Ke Mutaliq Humme Khabar Di Yaha Tak Ke Jannati Aapne Aur Jahanummi Aapne Theekano Mein Puhuch Gaye. Isse Jisne Yaad Rakha To Yaad Rakha Aur Jo Bhool Gaya Woh Bhool Gaya.
[ Sahih Bukhari : Hadees No. 3192 ]


3) Qayamat Tak Ke Tamam Wakiyat Ka Bayan : Hazrat’e Huzefa ( Radi Allahu Anhu ) Ne Farmaya, Nabi E Karim ( Sallallahu Alaihi Wasallam ) Ne Ek Aisa Khutbaa Diya Jisme Qayamat Ki Koi Cheez Bayan Karna Na Chordi. Usse Jaana, Jisne Jaana, Aur Jo Na Jann Sakka So Na Jann Sakka. ( Un Batai Hui Baat’o Mein Se Bhooli Hui Kisi Cheez Ko Jab Hote Hue Dekhta Ho To Pehechan Leta Ho Jaise Admi Aapne Se Bichdi Hui Cheez Ko Dekhte Hi Pehchan Leta Hai.
[ Sahih Bukhari : Kitaab Ul Qadr : Hadees No. 6604 ]


4) Hazrat E Asma Binte Abi Bakar ( Radi Allahu Anhu ) Se Riwayat Hai , Woh Farmati Hai Mein Zojaa’e Nabi Hazrat E Aisha Radi Allahu Tala Unha Ke Pass Us Waqt Aai Jab Suraj Jo Girhan Lag Chukka Tha, Aur Log Namaz Ke Qiyam Mein The Aur Hazrat E Aisha Bhi Namaz Mein Qiyam Ki Halat Mein Thi, Mene Unse Kaha Log Kis Liye Namaz Parh Rahe Hai Unhone Asmaan Ki Taraf Ishara Kiya Aur Kaha Subhan Allah, Mene Kaha Kya Koi Nishaani Hai Unhone Sir Se Ishara Kia, Haan. Iske Baad Mein Bhi Namaz Ke Liye Khadi Ho Gai Itni Der Tak Ke Mujh Per Behoshi Taari Hone Lagi. Aur Mein Aapne Sir Per Paani Daalne Lagi , Namaz Ke Baad Nabi E Karim ( Sallallahu Alaihi Wasallam ) Ne Allah Tala Ki Hamd O Sana Ki Phir Farmaya “ Koi Cheez Aisi Nahi Jo Mene Na Dekhi Thi Magar Is Jagah Khade Ho Kar Dekh Li, Yaha Tak Ke Jannat Aur Dozakh Bhi
“ [ Sahih Bukhari : Kitabul Salat : Hadees No. 1053 ]


5) Hazrat E Anas ( Radi Allahu Anhu ) Se Riwayat Hai Ke Nabi E Karim ( Sallallahu Alaihi Wasallam ) Ne Hazrat E Zaid Jaffar Aur Ibne Ravaahaa ( Radi Allahu Tala Unhum ) Ki Maut Ki Khabar Aane Se Pehle Logo Ko Unki Maut Ki Khabar Di, Is Tarha Ke Nabi E Karim ( Sallallahu Alaihi Wasallam ) Farma Rahe The “ Janda (flag) Zaid Ne Pakda Hai Aur Woh Shaheed Ho Gaye, Phir Jaffar Ne Liya Hai Aur Phir Woh Bhi Shaheed Ho Gaye, Phir Ibne Rawahaa Radi Allahu Tala Anhu Ne Liya Aur Woh Bhi Shaheed Ho Gaye “ Aur Nabi E Karim ( Sallallahu Alaihi Wasallam ) Ki Ankhe Aashk Baha Rahi Thi, Phir Farmaya, Yaha Tak Ke Janda Allah Ki Talwaaro Mein Se Ek Talwaar Ne Liya ( Yaani Khalid Bin Walid Radi Allahu Tala Unhu ) Hat’ta Ke Allah Ne ( Musalmao Ko ) In ( Kaafiro ) Per Fatah Di.
[ Sahih Bukhari : Kitabul Maghazi : Hadees No. 4262 ]


6) Hazrat E Ibne Abbas ( Radi Allahu Anhu ) Riwayat Hai Ke Nabi E Karim ( Sallallahu Alaihi Wasallam ) Do Qabro Ke Pass Se Guzre To Farmaya “ Unhe Azaab Ho Raha Hai Aur Kisi Kabeera Gunah Ke Baais Nahi, In Mein Se Ek To Peshab Ke Chitt’o Se Nahi Bachta Tha, Aur Dusra Chugliya Khata Phirta Tha.” Phir Ek Sabz Te’heni Li Aur Uske Do Hisse Kr Ke Har Qabar Per Ek Hissa Gaadh Diya . Logo Ne Arz Ki Ya Rasool Allah ! “ Aisa Kyu Kiya?” Aap Ne Farmaya , “ Jab Tak Yeh Khushk Na Ho Inke Azaab Mein Takfeef Rahegi.
[ Sahih Bukhari : Kitabul Wuzu : Hadees No. 218 ]


7) Hazrat E Anas Bin Malik ( Radi Allahu Tala Unhu ) Ne Farmaya Ke Nabi E Karim ( Sallallahu Alaihi Wasallam ) Ne Humme Namaz Parhai Phir Member Per Jalwa Afroz Ho Kr Farmaya Ke Mein Tumhe Peeche Se Bhi Is Tarha Dekhta Ho Jis Tarha Samne Se Tumhe Dekhta Ho.
[ Sahih Bukhari : Kitabul Salat : Hadees No. 419 ]


8) Hazrat E Abu Hurera Ra Se Marwi Hai Ke Nabi E Karim ( Sallallahu Alaihi Wasallam ) Ne Faramaya Tum Kya Yeh Hi Dekhte Ho Ke Mera Muh Idar Hai, Allah Ki Kasam Na Mujh Per Tumhara Koi Khushu Poshida Hai Aur Na Hi Tumhare Ruku, Mein Tumhe Peet Ke Peche Se Bhi Dekhta Ho.
[ Sahih Bukhari : Kitabul Salat : Hadees No. 418 ]


9) Hazrat’e Ukhbaa Bin Aamir ( Radi Allahu Anhu ) Se Marwi Hai Ke Nabi E Karim ( Sallallahu Alaihi Wasallam ) Ek Din Tashreef Le Gaye Aur Ahle Uhud Per Namaz E Janaza Ki Tarha Namaz Padi Phir Member Per Wapas Hue Phir Farmaya “ Houz E Kausar Per Tumhari Madad Ke Liye Mein Pehle Puhuchne Wala Hon, Mein Tumhara Gawah Ho Aur Allah Ki Kasam ! Mein Aapne Houz Ko Is Waqt Dekh Raha Ho, Aur Mujhe Zameen Ke Khazano Ki Kunjiya Di Gai. Allah Ki Kasam Mujhe Yeh Darr Nahi Ke Tum Log Mere Baad Shirk Karoge Lekin Mujhe Yeh Darr Hai Ke Duniya Ke Maal Ko Ek Dusre Se Hasil Krne Ki Lalach Karoge.
[ Sahih Bukhari : Kitabul Janaiz : Hadees No. 1344 ]


10) Hazrate Sahl Bin Saad Farmate Hai Ke Nabi E Karim ( Sallallahu Alaihi Wasallam ) Ne Gazwa E Khaibar Ke Roz Farmaya Kal Mein Janda Aise Shakhs Ko Duga Ke Allah Uske Hath Per Fat’ta Ata Farmayega, Woh Allah Aur Uske Rasool Se Muhabbat Karta Hai Aur Allah Aur Uska Rasool Use Muhabbat Karte Hai. ( Raawi Ka Bayan Hai Ke ) Logo Ne Raat Badi Bechani Mein Guzari Ke Dekhiye Ke Janda Kisko Ata Kiya Jaata Hai, Jab Subha Hui To Log Nabi E Karim ( Sallallahu Alaihi Wasallam ) Ki Kidmat Mein Hazir Hue Saare Yehi Tamana Le Kr Aaye The Ke Janda Mujhe Mil Jaye, To Nabi E Karim ( Sallallahu Alaihi Wasallam ) Ne Farmaya Ali Ibne Abi Talib Kaha Hai? Arz Ki Gai Ya Rasool Allah ( Sallallahu Alaihi Wasallam ) Unki Ankhe Dukhti Hai, Phir Unhe Bulaya Gaya, Woh Hazir E Khidmat Hue To Nabi E Karim ( Sallallahu Alaihi Wasallam ) Ne Unki Dono Ankho Mein Lu’aab E Dahaan Lagaya , Aur Unke Liye Dua Farmai, Woh Aise Shifa’yab Hue Goya Unhe Sire Se Takleef Hui Hi Na Thi, Phir Nabi E Karim ( Sallallahu Alaihi Wasallam ) Ne Unhe Janda Ata Farmaya.
[ Sahih Bukhari : Kitabul Maghazi : Hadees No. 4210

Mere Ghareeb Nawaz

Mere Ghareeb Nawaz..

Adab Qadambose..

Aaj aapka urus-e-shareef apni tamamtar faiz-o-barkaat ke saath manaya jaraha hai..Mujhe yaqeen hai is khatakaar ki peshi bhi hui hogi...ke aapne apne asre may humko jo le liya hai...hum say hamari kotahiyon ka hisaab kub liya hai...Aapki duaon ne hamesha hamara sar buland kiya hai..Aapke dar say judda ek nagina humko qismat say mila hai...uski barkaton say yehi ishara mila hai...ke aaphi ka hai vo ishara...jo vo hum say aa mila hai...

Mere khwaja aapke dar ki khushbu jub mere ehsaas ko chu ke guzri tab bhi mai nahi thi..faqat ek mujasim ehsaas ban gai thi...jisey aapke dar ki khushbu ne ek pal mehka ke kaha ye...le tu bhuli to kya hua hum nahi bhule tujh ko..tere derd ka hai ye chara.....tujhe derd may duba chodna nahi humko gawara....so ye ehsaas yehi kehta hai ye khushbu her zakhm her bharam ka dilasa hai....jisey khud ka hosh nahi vo kya jaane kub say pyaasa hai...ye pal javidan hai...ye pal meherbaan hai...ye pal dono jahaan hai...ye pal mere mehbub ka nishan hai....

Mere khwaja meri yehi dua hai meri ye iltija hai jub talak rahega alam aapka faiz yonhi jaari rahe...her khaas-o-aam aapki mohabbat say faizyaab hote rahen...aapki inayeten bant rahi hain...dilon may muntaqal horahi hain...in mohabbaton ko sada jaari rakhna...aapki duaon ka saaya yonhi banaaye rakhna....

Roohani Irteqa

Namaz Roza aur tamaam aqsaam ki ibadaat may tou insan mahaz banda-o-ghulam hota hai. Magar tableegh-e-Deen aur aqamat-e-Deen ki jadojahad may bande ko Khuda ki rifaqat-o-madadgaari ka sharf haasil hota hai jo is duniya may roohaani irteqa ka sab say ooncha martaba hai.

Fazal-o-Sharf Allah ke ekhtiyar may hai jise chahe atta fermaaye. Vo wasee-un-nazar hai aur sab kuch jaanta hai. Apni rahmat ke liye jis ko chahta hai muntakhab kar leta hai aur uska fazal sab say bada hai. Yaane Allah ko maalum hai ke kaun fazal-o-sharf ka mustahaq hai.

Insaan ki tawaqaat aur ummidon ko us ki kasoti per parakhne ke baad hi taabir nasib hoti hai ,taaki insan ko is baat ka ehsaas ho ke amal ka aaina hai zindgi...khuda per isi yaqeen ka naam hai bandagi.Banda asanian talab karte waqt ye bhul jaata hai ke khuda ne apne Mehbub ki mushkilon may jo misal qaayem ki thi unki haqeeqat kya hai. Gar efa-e-Mohabbat itni asan hoti phir na bande ki mushkilon may jaan hoti...Her phal apni nashonuma ka haq talab karta hai...koi bhi beej baghair kisi koshish ke shajar may tabdeel nahi hosakta..Aur koi shajar baghair kisi sayee ke khud ko buland-o-baala nahi kar paata.So sawab paane say pehle kaar-e-sawab ki ahamiyet apni jagah thos haqeeqat rakhti hai.

Sawab ke maayne hain natija-e-amal .Sawab-e-duniya say murad vo fawayed-o-munafe hain jo insan ko uski sayee-o-amal ke natije may isi duniya ki zindgi may haasil ho. Aur sawab-e-aakhirat say murad vo fawayed-o-munafe hain jo is sayee-o-amal ke natije may akhirat ki paayedar zindgi may haasil honge.

Taalib-e-haq ki awal faham durust hoti hai. Ye baseerat hai. Phir vo ahkaam qabul karta hai ye hidayet hai. Phir hidayet ka samra qurb-o-qabul inaayet hota hai. ye rahmat hai.

Rasam-e-Ulfat

saraapa husn ban jaata hai jin ke husn ka taalib

bhala aye dil haseen aisa bhi hai koi haseenon may

Rehti duniya tak her saal  ye mubarak mahina hamaari khushnasibi ko chaar chaand lagaata hua humare emaan ki taazgi ka sabab banta rahega...Vo rasam-e-ulfat jo awal khuda ne shuru ki jo uske mehbub ne nibhaiii wahi unki ummat ke hisse may aai...Ummat-e-Mohammadiya ki maqbuliyet ka raaz yehi hai, ke unhen raaz-e-ulfat say aagahi mili.Aur isi amal ka naam bandagi rakha gaya...Mohabbat may jahaan dil jhuka wahi qible ne rukh karliya....jahaan rooh sarshaar hokar paabos huii  wahi ibadat kehlaai..Gharz Rab ne adam ko is tarha mohabbat sikhaii...Uske Mehboob may thi uski hi jalwa-numaii...

Allah ney insaan ki paidaish ka sabab ibadath bataya hai.Insaanon aur jinnon ko sirf ibadath ke liye paida kiya gaya. Admi ki rooh sirf taqwa aur sabar ke zariye hi ghilazathon say paak hosakti hai aur jis qadar ye kasafath kum hoti jaati hai utna hi roohaani tarraqi ka raasta humwaar hota jaata hai. Insaan ki roohaani taraqi ki sab say badi rukawat nafsani khahishaath ka beqaabu hojaana hai.

Ibn-e-Arabi Rahmatllah alahi ney apni kitaab " Fatuhaath-e-Makkiya " may Mohammed sallam ki tareef karte huye likha hai ke RasulAllah sallam say pehle bhi tamaam shariyeton may Mohammed RasulAllah sallam ka asar-o-nafuz ek bawatan haisiyet rakhta tha. Jo khud unke liye mukammal-tareen ahakamaath ki shakal may zaahir hogaya. Aur RasulAllah ne fermaya " Mai us waqt bhi Nabi tha jub adam paani aur mitti ke darmyaan they." 

Huzur ki etedal-pasandi ka ye alam hai ke Aap ney logon say kaha " tum duniyawi maamlaath may apni maslihaton ko behter samajhte ho, apne kaam apni merzi say karo, Sirf khair aur adal per qaayem raho. Shirk aur kufar na karo. Aur koi aisi baat na karo jo rooh-e-islaam ke khilaaf ho.

Ibn-e-Arabi Rahamatullah Alaih kehte hain ke ummat-e-Mohammadiya may Anbiya-o-Awliya Allah ke behad pasandeeda bande hote hain. Nabi ya wali vo hota hai jisko Allah ummat ki bahbudi ke liye moqarar kare, un per apni khaas inaayet fermaata hai. Ek wali kaamil shareeyet-e-Mohammadiya ke israar-o-ramooz samajhta hai aur unhi kashafi halaath may kalaam-e-ilaahi aur kalaam-e-rasul sallam ke israar khulte maalum hote hain.Vo in taasuraat ko khud apne nafs ki islaah aur awamunnaas ki islaah ke liye istemaal karte hain.Aur sahi ko ghalath say alag kar dete hain.

Jo shaks saadiq hota hai vo apne iraade aur emaan ka mazbut hota hai aur apne nafs per puri qudrat rakhta hai. Usko deen-o-duniya per eqtedaar aur hikmat-o-fazl-e-ilaahi ka darja haasil hojaata hai. 

Shaitaan ka karnaama ye hai ke vo amar haq aur tumhaare ahawaal ki munasibat say beech may soorat-e-haal ko badal deta hai aur agar tum is qaabil na ho ke haq-o-nahaq may tameez karsako tou vo tum ko gumraah kardeta hai.

Sawa-as-Sabeel

"Sawa-as-sabeel " ka tarjuma "tawasat-o-etedal ki shah raah " kaha jaa sakta hai magar is say pura mafhum ada nahi hota. Is lafz ki maanuwiyet ko samajhne ke liye pehle ye zehen nasheen kar lena chahiye ke insaan bajaaye khud apni zaat may ek "aalam-e-asghar" hai. Jis ke andar beshumaar quwaten aur qaabiliyeten hain, khahishen, jazbaat aur rehjanaat hain. Nafs aur jism ke mukhtalif mutalibey hain, Rooh aur tabiyet ke mukhtalif taqaaze hain. phir in afrad ke milne say jo ijtimaayee zindgi banti hai vo bhi behad-o-hisaab pecheeda taaluqaat say murakkab hoti hai aur tahzeeb-o-tamaddun ki nashonuma ke saath saath iski pechidgiyaan bhi badhti chali jaati hain. Phir duniya may jo samaan-e-zindgi insan ke chaaron taraf phaila hua    
hai us say kaam lene aur usko insaani tamaddun may istemaal karne ka sawaal bhi anfaradi aur ijtimaayee haisiyet say bakasrat shaakh-dar-shaakh masaayel paida karta hai.

Insaan apni kamzori ki wajah say pure arsa-e-hayaat per bek waqt ek mutawazan nazar nahi daal sakta. Is bina per insaan apne liye khud zindgi ka koi aisa raasta nahi bana sakta jisame uski saari quwaton ke saath insaaf ho, uski tamaam khahishon ka thik thik haq ada hojaaye, uske saare jazbaat-o-rehjanaat may tawazan qaayem rahe. Uske sab andruni-o-bairuni taqaaze tanasab ke saat pure hon. Uski ijtimayee zindgi ke tamaam masaayel ki munasib riyaayet malhuz ho. Aur un sab ka ek hamwaar aur munasib hul nikal aaye. Aur maadi ashiya ko bhi shaksi aur tamaduni zindgi may adal, insaaf aur haq shanaasi ke saath istemaal kiya jaata rahe.

Jub insaan khud apna rahnuma aur shaara banta hai tou haqeeqat ke mukhtalif pehlu, zindgi ki zaruraton may say koi ek zarurat, hul talab maslon may say koi ek masla uske dimaagh per is tarha mussalat hojaata hai ke dusre pehluvon aur zaruraton aur maslon ke saath vo bilirada ya bilairada be-insaafi karne lagta hai. aur uski raaye ki zabardasti nafez karne ka natija ye hota hai ke zindgi ka tawazan bigad jaata hai aur vo be-etedaali ki kisi ek intiha ki taraf tedhi chalne lagti hai. Phir jub ye tedhi chaal apne aakhiri hadudh per pahunchte pahunchte insaan ke liye naqaabil-e-bardasht hojaati hai tou vo pehlu aur vo zaruriyaat aur vo masaayel jin ke saath beinsaafihui thi baghawat shuru kar dete hain aur zor lagaana shuru karte hain   ke unke saath insaaf ho. Magar insaaf phir bhi nahi hotakyon ke phir wahi amal ronuma hota hai ke unme say koi ek, jo saabiq be-etedaali ki badaulat sab say zyada daba liya gaya tha insaani dimagh per haavi hojaata hai aur usey apne makhsus mukhtaza ke mutabiq ek khaas rukh per baha lejaata hai jisme phir dusre pehluvon aur zaruraton aur maslon    ke saath be insaafi hone lagti hai. Is tarha insaani zindgi ko kabhi seedha chalna nasib nahi hota, vo hamesha hichkhole hi khaati rehti hai aur tabaahi ke ek kinaare say dusre kinaare ki taraf dhalakti jaati hai. Tamaam vo raaste jo khud insaan ne apni zindgi ke liye banaaye hain, khat-e-munhani ki shakal may waqya hain ghalath simt say chalte hain aur ghalath simt per khatam ho kar phir kisi dusri ghalath simt ki taraf mud jaate hain.

In bahut say tedhe aur ghalath raaston ke darmyaan ek aisi raah jo bilkul wast may waqya ho, jisme insaan ki tamaam quwaton aur khahishon ke saath, uske tamaam jazbaat-o-rehjanaat ke saath, uski rooh-o-jism ke mutalibon aur taqaazon ke saath aur uski zindgi ke tamaam masaayel ke saath pura pura insaaf kiya gaya ho, jiske andar koi tedh, koi kaji, kisi pehlu ki bejaa riyayet aur kisi dusre pehlu ke sath zulm aur be-insaafi
na ho, insaani zindgi ke sahi erteqa aur uski kamyaabi-o-ba-muraadi ke liye sakht zaruri hai. Insaan ki ain fitrat is raah ki taalib hai aur mukhtalif tedhe raaston say baar baar uske baghawat karne ki asal wajah yehi hai ke vo us seedhi shah raah ko dhundti hai. Magar insaan khud us shah raah ko malum karne per qaadar nahi hai. Uski taraf khuda hi rahnumai kar sakta hai aur khuda ne apne rasul usi liye bheje hain ke is raah-e-raast ki taraf insaan ki rahnumai karen.

Quran is raah ko Sawa-as-Sabeel aur Sirat-e-Mustaqeem  kehta hai. Yeh shah raah duniya ki is zindgi say lekar aakhirat ki dusri zindgi tak beshumaar tedhe raaston ke darmyaan say guzarti chali jaati hai.Jo is per chala vo yehaan raah-e-raast ru aur kamyaab-o-bamuraad hai.Jisne is raah ko gum kardiya vo yehaan ghalath-been, ghalath ru aur ghalath kaar hai aur aakhirat may  la-mohala usey dozakh may jaana hai, kyon ke zindgi ke tamaam tedhe medhe raaste dozakh hi ki taraf jaate hain.